點樣做到享受月經

經痛係可以避免嘅；月經令自己生產力降低亦唔需要怪責自己。如果正面啲咁睇，月經可以係女性嘅恩物。

無端端講咩享受月經？

前嗰排我睇咗一本書，書名叫做Seeing Red，呢本書係外國一個叫做Claire Baker嘅月經KOL介紹比我睇嘅。（係，外國真係有月經KOL，香港比較少聽到有，如果各位認識任何月經KOL可以介紹我識。有啲人覺得好似為KOL而KOL，但我覺得月經KOL有價值，因為好多女性（同男性）都真係對呢方面認識唔夠，需要教育。）

Seeing Red by Kirsten Karchmer

點解要擁抱月經？

作者係一個醫生，認識西醫理論，對中醫亦都有認識。

當時買呢本書係因為我每一個月都花好多時間去擔心自己月經來得唔準，又擔心自己月經嘅時候太攰，冇心機做嘢，做嘢效率唔夠高。

想改善呢個驚黎經唔準，每個月心驚驚嘅問題，所以就喺Audible用1個credit買咗呢本書黎聽喇。

估唔到真係好有得着喎！

呢本書講到其實好多女性，都因為多年來嘅灌輸，下意識地認為月經係一件好污穢嘅事。由古時到而家，由宗教到社會，唔同嘅institutions都話俾我哋聽，女性的月經係污糟嘅事，本書引經據典，講番好多宗教嘅典籍同權威思想家，都話過男性唔應該接觸正在行經嘅女性；任何嘢比正在行經嘅女性掂到，都會變得污穢；行緊經嘅女性坐過嘅凳，男性都唔應該坐；經血係污穢而唔應該接觸嘅嘢，接觸左就會行衰運。

Photo by Erol Ahmed on Unsplash

女人亦都因為會行經呢件事，而承受咗好多社會壓力。例如佢哋必須要令自己盡全力令到其他人唔知道自己正在行經，即使月經嚟緊，都要盡可能將月經變到無色、無味、無臭，絕對唔可以整污糟床單，亦都唔可以整污糟自己嘅衫褲，最好就係靜靜黎精，不動聲色。

就係正正因為月經呢一種禁忌嘅地位，好多女仔都即使遇到經期唔正常嘅情況，都唔敢同其他人講，造成極大壓力。

提早停經（early menopause）的警號

作者亦剖白，話自己細個嘅時候，曾經將月經視為弱者嘅表現，作者仲係少女嘅時候，提早體驗咗停經嘅痛苦。佢最初都唔為意停經有咩問題，甚至覺得自己一個月裏面30日都可以自由自在咁樣做運動，真係好呀。但係當佢月經停咗之後，佢發現佢做好多嘢都冇力，身體狀況亦都插水式咁樣變差。後來，佢睇咗醫生，接受左治療，月經先變返正常，身體亦都康復過黎。

月經=免費身體檢查？！

作者想帶俾我哋嘅訊息好簡單：其實我哋女性可以將月經視為一份禮物，係生育能力（fertility）嘅象徵，同時亦都係健康嘅一種非常有效嘅診斷工具，如果月經嘅情況健康，亦意味着整體健康狀況好大可能良好，如果月經遲來，或早嚟，或太頻密，或太梳，或者經血狀況有異樣，就可以睇得出女性健康情況欠佳，從呢個角度睇黎，其實月經係一種「免費」嘅身體檢查，係女性嘅恩物。

月經健康可以改善

作者亦都有講到月經穩唔穩定，嚟得健唔健康，係可以改善嘅，並唔係天生嘅。每個女人都可以透過食療、運動，同埋適當嘅生活方式去調節月經。當月經黎得好，仲可以係無痛無血塊嘅添！

當女性能夠利用月經，努力令自己身體更加健康，進而令到自己經期穩定，嚟得準，經血質素變好，月經嘅存在意義就變得積極好多喇！

大家都知道，我成日有留意同創業有關嘅分享，其中有一個我會留意嘅就係YouTube guru Sunny Lenarduzzi，佢都有講過，佢每一個月嘅每一日嘅生產力都唔同，所以佢唔會每一日跟住同一個schedule，因為女性獨特嘅身體設計/構造，女性其實唔應該日日都用住一樣嘅節奏做嘢嘅，因為喺一個月裡面，我哋每一日身體裡面嘅荷爾蒙水平都唔同，所以月經周期其實係會影響到我哋工作嘅效率。

我覺得呢個分享非常之有用，作為一個創意工作者，我知道我嘅工作裏面好重要嘅一個部份就係保持心境開朗同埋情緒穩定，當我因為月經或者身體不適而要慢落嚟，做嘢冇咁快嘅時候，我必須要明白到兩點。

第一，我可以從生活習慣著手，改善我嘅月經質素；

第二，因為月經周期嘅本質，我唔可以每一日做嘢都咁快、狠、準。我身體嘅運作已經注定左我每一日做嘢速度應該係有快有慢嘅。當我慢落嚟嘅時候，我就唔需要怪責自己懶或者唔夠快，我亦都唔需要覺得內疚，因為呢個係自然嘅定律。

呢一本書教識咗我點樣可以擁抱同欣賞月經，而唔係害怕佢嘅來臨，同埋點樣可以同月經周期配合，調整自己工作速度，而唔係當自己慢落嚟嘅時候就內疚同埋怪責自己。

其實，月經都令我工作積極左好多架！各位女性，加油啊！

Photo by Alora Griffiths on Unsplash