咩係真正贏在起跑線

前兩日，我朋友喺佢個IG Story上面分享左一段文章，文章裏面教導人要點樣先可以學識撒嬌，文章提到，其實人天生就識撒嬌，撒嬌係唔需要學嘅，只不過喺成長嘅歷程之中，因為佢哋受過父母對佢哋愛嘅拒絕，因為人嘅自我保護機制（self-protection mechanism），所以佢哋忘記咗撒嬌呢個本能，甚至係刻意咁嘗試忘記咗點做撒嬌呢個行為，保護自己，令自己唔會再受傷害。（你試下撒嬌嘅時候比人兜巴星，咁你之後都幾難會再撒嬌，係咪？）

Photo by Alexander Dummer on Unsplash

喺現實生活裏面，有時會發生咁樣嘅事：有啲人撒嬌嘅時候，其他人就會話佢發姣，成日都撒嬌，冇黎成熟，其他人都唔識得自己獨立處理問題。

經常、向每一個人撒嬌當然唔係好事。

但係喺戀愛關係裏面，同愛人之間相處，其實撒嬌係一個好有用嘅行為，唔係話因為撒嬌可以幫我哋贏得愛人嘅寵愛，而係因為撒嬌可以幫助我哋向愛人表示：其實我需要你嘅關注啊，我需要你嘅愛啊，你嘅愛對我係好重要㗎，我希望你望下我、留意下我啊。

有一對容許自己係適當時候撒嬌，唔會盲目地要求自己堅強起嚟，容許自己喺佢哋面前展示脆弱嘅一面，ask for愛嘅父母，係好重要嘅。

因為咁樣嘅父母，先可以保存我哋願意展示自己脆弱一面（show vulnerability）嘅能力。而唔係刻意忘記或者unlearn呢種本能。

我記得我細個嘅時候，甚至去到大個啲嘅時候，我臨瞓之前真係會錫爹哋媽咪一啖，無論我哋當日嗌咗咩交都好，我會同你媽咪講爹哋媽咪講：「錫錫。」

爹哋媽咪就會錫我一啖，跟住我就可以安心去瞓覺。

所以，我由細到大都唔會有一種比缺乏安全感困擾，由細到大都唔會有不安感，覺得自己不值得被愛嘅。因為父母係容許，亦reward我撒嬌嘅。

真正嘅贏在起跑線，係有愛你嘅父母，呢對父母識得示範比你睇咩叫愛，識得教曉你點樣愛其他人同埋幫助其他人，同埋向其他人顯示自己脆弱一面，而唔會覺得ask for愛，係一件好羞恥嘅事。