想寫文，但怕錯又怕寫唔好？
又黎一篇，有關寫作心態嘅文章。
因為我見到太多寫文可以寫得好好，但get in their own way嘅作者；明明寫嘅嘢，人地會覺得好睇，但因為佢地覺得自己嘅作品唔好，就唔放出黎嘅作者。
Photo by Volodymyr Hryshchenko on Unsplash
好多朋友問我， Tiffany，你已經咁忙，但係點解做到幾乎每日一文呢？
我嘅答案好簡單，因為我唔會批判（judge）自己做得幾好同幾差。
當我開始批判，我就會因為恐懼同埋內疚，而停止創作。
我只知道，只要我每日寫，我就會進步。所以我唔會因為今日寫得冇尋日咁好就批判（judge）自己。
記住，只要寫，唔好批判。因為quality is subjective。你自己覺得自己寫得差嘅嘢，可能會好幫到人。
Don’t judge yourself.
Don’t judge yourself.
Don’t judge yourself.
又係GaryVee，GaryVee講嘅嘢，聽落好簡單，但其實如果生活裡面執行到，心態真係會健康到癲。
事實上，喺社交媒體創作犯錯，又有好多好處，只要開始創作，亦一定會犯錯。
只不過大家喺香港、華人圈同亞洲區域生活，都會慣咗一樣野，就係覺得犯錯係唔好，要盡量避免錯誤。
其實呢種批判嘅習慣，係會令到我哋寫嘢嘅時候，自己搵自己笨，變咗好怕創作，亦都好怕擺唔完美嘅作品出去比人哋批判。
我地要明白點解我地覺得我地寫文寫得唔好，我地覺得我地唔好，係因為我哋自己都批判自己，我哋下意識咁覺得其他人都會批判我哋。
—
犯錯會令到你嘅觀眾擔當起校對嘅工作，喺comment嗰度糾正你。
marketers成日諗爆頭，想令到觀眾comment自己嘅作品。兵不厭詐，其實最容易令到人哋comment自己作品嘅方法，就係寫錯字。
唔知大家有冇聽過一個Marketing嘅例子，例子裏面，有個人同法拉利跑車影咗一幅相，指住架法拉利話，依家係林寶堅尼。
為嘅就係令人喺comment糾正佢。
Photo by Brayden Law on Unsplash
或者你會覺得呢個例子好誇張，但呢個例子想講嘅就係，Marketer可以兵不厭詐，無所不用其極，甚至不惜犯錯，為咗就係引來人哋嘅comment。
或者你會覺得，喺comment度改人哋錯別字真係好低B姐。但係大部分人的確係膚淺嘅。改人地一篇文裏面有冇錯別字， Grammar有冇錯，的確比起判斷其他人嘅想法有冇價值容易。正正係因為咁，好多人都只係會comment人哋篇文裏面有錯別字，或者grammar錯，而唔會評論人哋究竟想法有冇價值想法究竟有冇價值。
我曾經喺Youtube片裡面，講錯咗墨爾本係澳洲首都，條片出咗超過半年，每一日都有人黎提醒我講錯，可見香港人真係好執著事實性嘅錯誤。
唔係話你要可以犯錯引人comment，但盡咗力做好，唔小心犯錯真係一個引起comment嘅好有效方法。
犯錯會容許你展示自己嘅脆弱同人性嘅一面
細個聽過相信大家都聽過一句說話叫做：「無敵係最孤獨嘅。」
細個唔係好明白呢句說話嘅真諦，大個自己自學marketing嘅時候，就會發現vulnerability（若略翻譯做脆弱/不完美）係一個好重要嘅特質。一個人淨係一味報喜不報優，展示自己成功嘅一面，總係好乞人憎嘅，因為呢個世界上冇人係完美，亦都冇人鍾意完美嘅人，當你太過成功，太過有錢，太過靚，太過瘦，總係會令人討厭嘅。
每個人都有頹廢嘅一面，每個人都有脆弱既一面。只要你唔係過分咁樣怨天怨地，淨係識喺文章之中宣洩負面情緒，其實適當咁樣去分享自己生活裏面負面嘅部份，反而會俾人一種真實感覺，亦都會比到人共鳴。
喺呢個角度睇嚟，犯錯反而會令到你更加可愛，有咩唔好呢？
犯錯會突顯你之後嘅作品有進步，進步又一定要透過犯錯先達到。
我睇返我三四年前嘅文，有一篇文章叫做「情感百子櫃」。
其實聽到個title，都好無聊。
文章裡講到，一個詞語俾我哋係好多種感覺嘅混合，我哋係唔可以單純用中文嘅一個詞彙去英文裡面嘅一個詞彙嘅；見到一個英文嘅詞彙嘅時候，我哋應該係我哋腦裏面嘅情感百子櫃裡面，搵返相對應呢個英文自己感覺，去理解呢個英文字。而唔係就咁用一個中文字去理解英文字。
另一篇文裏面，我用英文去分析王家衛嘅花樣年華點解係好嘅文學作品。
當然，呢啲文章都表達左我嘅想法，觀點亦有一定嘅獨到之處（意思係少人討論呢啲嘢）。
但係比起我而家寫嘅文章，呢啲文章就相對離地好多啦。
但就係因為我日日寫，個個禮拜都寫，就算自己冇靈感都坐低打幾隻字，就係因為我迫自己恆常寫作，由我以前寫嘅嘢好離地，令到我而家寫嘅嘢貼地咗好多。
真係解決到多人嘅問題，而唔係自high打飛機。
話寫嘢寫得差先顯得將來進步，好似好自欺欺人；但係如果因為寫得差就唔寫，又真係唔會進步喎。
睇嚟依篇文之後，你會唔會冇咁怕犯錯呢？寫作嘅時候亦都會唔會順利好多呢？
文友 Wright Fu話，覺得寧願沈默，都唔好出行貨嘅文章。但係，都係個句，你覺得行貨，人地可能覺得係寶。
行唔行貨係subjective嘅。因為你個腦裡面成日都思考同一啲嘢，所以你會覺得你嘅想法係係人都諗到，不值一提嘅。就好似文友 IF講德國嘢，可能對佢係日常，但對我黎講好新奇，因為我唔係住係德國。就好似 華田 Watin講金融，可能對佢黎講好簡單，但我對金融就一無所知了。
我講創作心態，絕對有人可能覺得好虛無，但我相信我講嘅嘢，好大可能好多文友都未必有諗過，就算有諗過，都未必諗到清楚到articulate到出黎。
你覺得你寫嘅嘢好行好無聊？
仲有一種同害怕犯錯相似嘅心態，就係怕自己寫嘅觀點唔夠精闢同高明。事實上，寫作人，好多時都係某個範疇嘅擁有相當多知識嘅人，通常呢啲人都會飽受the curse of knowledge嘅困擾，因為覺得身邊嘅人同自己知識水平相若，所以自己嘅知識根本不值一曬，不值一提，冇咩值得同人分享。但事實上，好多時啲作者，只要能夠做到我手寫我心，已經會解決到好多讀者嘅困難同苦惱。因為每個人熟悉嘅範疇都唔同，讀者同作者嘅水平差距亦往往比作者想像中大。
結語
唔好吝惜自己寫作嘅能力，你覺得自己寫得唔好，絕對唔代表人地唔覺得你寫得好。我講過好多次，我覺得自己寫得唔錯嘅文，冇人clap；但我覺得自己好無聊嘅文，就好多人clap。
唔好人地未judge你，你就先judge咗自己先只得架。
